zurück zur
Gedichtübersicht

Sie hen mer gseit im Dorf, i sott's nit tue.
Sie hen mer gseit: «Es schickt si nit. Sie zürnt's.
Du weisch nit, wie me mit der Fürstin redt
in diner gueten Eifalt. Blib deheim!»
O nei, 's isch nit so, edli Fürstefrau!
Nei, d'Liebi het e gueti fini Red,
und so ne Gmüet wie eueres zürnt's nit.
Dr sind jo in ganz Fürsteberg so lieb.
Dr wüßet's nit, der glaubet's nit, wie lieb.
Drum hani denkt, i gang und sageres
und bringere mi frumme Segeswunsch
und bringere mi treu und dankbar Herz.
O Fürstin, euer schöne Name wohnt
in alle Herzen, und im Himmel stoht
er, denkwohl, au, und isch den Engle lieb.
Den Engle gfallt, was frumm und güetig isch
und in der Hochheit Demuet üebt und gern
mit Wort und Werk und süeßem Blick erfreut.
Vergelt's Gott, was dr tüent und was dr sind.
Mehr gilt wohl, was men isch, as was me tuet.
O Frau, es hen der süeße Freude viel
im Menscheherze Platz, so eng es isch,
 im Muetterherze gar. Erfüll Gott euch
und eue Her mit Freuden ohni Maß,
und heig Gott eui guete Chinder lieb
und schenk em Töchterli der Muetter Gmüet,
em junge Herli 's Vaters Sinn und Geist!
Das isch mis Herze Wunsch zuem schöne Tag,
zuem Name, wo in alle Herze wohnt.
O nehmet's güetig uf.