Der Nachtwächter. Mitternacht.

 
         „Loset, was i euch will sage !

          D'Glocke het zwölfi gschlage."
 

 Wie still isch alles! - Wie verborgen lit,

  was Lebe heißt, im Schos der Mitternacht

 uf Stroß und Feld! Es tönt kei Menschetrit,

 es chlöpft kei Geisel us der Ferni her,

 kei Huus thür garet, und kei Othem schnuuft,

 und nit emol e Möhnli rüeft im Bach.

 's isch alles hinterm Umhang iez, und schloft,

 und öb mit liichtem Fuß und stillem Tritt

 e Geist vorüber wandlet, weißi nit.
 
    Doch wasi sag - ruuscht nit der Tiich? Er
                                                            schießt
 dur s Wehrlauf ab am müde Mühlirad,

 und näume schliicht der Iltis unterm Dach

 de Tremle no, und lueg, dört obe zieht

 vom Chilchthurn her en Uhl im stille Flug

 dur d'Mitternacht, und hangt den nit im
                                                         Gwülch
 die großi Nachtlaterne dört, der Mond?

 Still hangt sie dört, und d'Sterne flimere,

 wie wen men in der dunkle Rege nacht

 vom lange Gang ermattet, uf der Stroß

 an d' Heimeth chunt, no keini Hüser sieht,

 und nume do und dört e fründli Liecht -
 
 Wie wirds mer doch uf eimol so kurios

 wie wirds mer doch so weich in Brust und
                                                      Herz?
 As weni briegge möcht, weiß nit worum,

as wenni 's Heimweh hätt, weiß nit no was?
 
       „Loset, was i euch will sage !

       „D' Glocke het zwölfi gschlage.

           „Und ischs so schwarz und finster do,

           „se schine d' Sternli no so froh

           „und us der Heimeth chunnt der Schi

           „'s muß lieblig in der Heimeth sÿ.
 
 Was willi? Willi übere Chilchhof go  x
  ins Unterdorf? es isch mer d' Thür seig of,   x
  as wen die Todten in der Mitternacht x
  us ihre Gräbere giengen und im Dorf x
  e wenig luegten, öb no alles isch  x
 wie almig. 's isch mer doch bis dato ken x

 bigegnet, aß i weiß. Denkwol i thu 's,

 und rüef de Todte - nei sel thuni nit!

 Still willi uf de stille Gräbere go!

 sie hen io d' Uhr im Thurn, und weißi
                                                    den,
 isch au scho ihri Mitternacht verbeÿ ?

 's cha sy, es fallt noch dunkler alliwil

 und schwärzer uf sie abe; d' Nacht isch lang.

 's cha sy, es zuckt e Streifli Morgeroth

 scho an de Berge her - i weiß es nit.
 
 's wär heimli do, se schlofe alli wohl,

 Gott gunenes! - e bizli schuderig,

 sel läugni nit; doch isch nit alles tod.

 I hör io 's Unruh in der Chilche, 's isch

 der Puls der Zit in ihrem tiefe Schlof

und d' Mitternacht schnuuft vo de Berge her,
 
ihr Othem wandlet über d' Matte, spielt
 
 dört mittem Tschäubbeli am grüne Nast
 
 und pfiift dur d'Scheje her am Gartehag.
 
 Sie chuuchet füecht an d'Chilchemur und chalt,
 
 die lange Fenster schnattere dervo
 
 unds lopperig Chrütz - und lueg, do lüftet sie
 
 en offe Grab - du guten alte Franz
 
 se hen sie au di Bett scho gmacht im Grund,
 
 und 's Deckbett wartet uf die nebe dra,
 
 und d' Liechter us der Heimet schine dri ,

 bis aß de chunsch, und lege Hofnig dri !

 He nu, es gohtis allen au no so.

 Der Schlof zwingt iede vonhen, eb er endli gar

 in d'Heimeth dure chunt. Doch wer emol

 sii Bett im Chilchhof het, gottlob er isch

 zum lezte mol do niden übernacht.

 und wen es taget, und mer wachen uf,

 und schliefen use, hemer nüme wit,

 e Stündli öbben, oder nit emol. -

 Se stolperi den au no d'Stapflen ab

 und bi so nüchter bliebe hinechtie.
 
        „Loset, was i euch will sage !

        „D' Glocke het zwölfi gschlage.
 
               „und d' Sternli schine alli no,

               „und us der Heimet schimerts so

               „und 's isch no um e chleini Zit

               „Vom Chilchhof seig s is nüme wit."

  
 Wo bini gsi? wo bini echterst iez ?
  
 e Stäpfli uf, e Stäpfli wieder ab,
  
 und witers nüt ? Nei weger, witers nüt !
  
 Isch nit 's ganz Dörfli in der Mitternacht
  
 e stille Chilchhof ? Schloft nit alles do
  
 wie dört vom lange müde Wachen us,
 vo Freud u. Leid, und isch in Gottis Hand  
  
 do unterm Straudach dört im chüele Grund
  
 und warte bißes taget um sie her ?
 
 He, 's würd io öbbe ! Und wie lang und schwarz

 au d' Nacht vom hohe Himmel abe hangt
 Vertschlofen isch der Tag deswegen nie,  
 
 und bißi wieder chum, und no e mol,
 
 se weiht mer scho der Morgeluft ins Gsicht,
 
 se gen mer d'Guhl scho Antwort weni rüef;
 
 der Tag verwacht im Tannewald, er lüpft

 alsgmach der Umhang obsi; 's Morgelicht
 
 es rieslet still in d' Nacht, und endli wahlts
 
 in goldne Strömen über Berg und Thal.
 
 Es zukt und wacht an allen Orte; 's goht
 
 e Lade do, und dort e Husthür uf
 
 und 's Lebe wandlet use frey und froh.
  
   Du liebe Gott, was wirds e Fÿrtig ge,
 
 wen mit der Zit die lezti Nacht verrint sinkt,
 
 wen alli goldne Sterne groß und chlei,
 
 und wen der Mond und 's Morgeroth und d' Sunn
 
 in Himelslicht verrinen und der Glast
 
 bis in die tiefe Gräber abe dringt
 
 und d' Mutter rüeft de Chindere: „ s isch Tag!"

 








und alles usem Schlof verwacht, und do
 
 ne Lade ufgoht, dort e schweri Thür!
 
 Die Todte gen use iung und schön

 's het mennge Schade gutet übernacht,

 und menge tiefe Schnatte bis ins Herz
 
 isch heil; sie lugen use iung und schön
 
 sie tunke 's Gsicht in roth Himelsluft, sie
                                                   stärkt   
 bis tief ins Herz. Du alte Nar was briegsch ?   
 
         „Loset, was i euch will sage !
 
         „D' Glocke het zwölfi gschlage.
  
               „und d' Sterne flimere alli no
 
               „der Tag will iemerst no nit cho.
 
               „Doch schlofe mer in Gottis Hand
 
               „do unterm Dach und dört im Stand."

Autograph-Kopie:

Universitätsbibliothek Basel
Shelf Mark: UBH Autogr Geigy-Hagenbach 1149
Persistent Link: https://doi.org/10.7891/e-manuscripta-136146
 

nach oben  

v